telu apa 'm'

udan teka ngajak crita

marang janma kang lagi gela

gela merga bata muni dipancal prabata

muntah warih tan subasita

teles klebes gawe greges-greges

si bata milih anteng lan ringkes-ringkes

mbongkar tutup nganggo cathut

cathute driji kang mingkup

aksara m mati

ditututi n nyebur kali

jebul o ya malah meri

kakoyak angka 6 kang ngegirisi

meneng klakep sajak nora ngajeni

m diganti telu

mangkono kudu digugu

n diganti padha karo

merga nora nduwe loro

o diganti angka nol

sajak kaya si pengung

dene enem nora ana ganti

mulane ya rada lara ati

tekan kapan papan iki mati

apa ya wis wancine ketemu basundari?

Sekaran, 5 maret 2015

tembang moneng

tata mbedhayani ing gumuyune jagat
nggaya tarutala ngalor ngidul ngetan ngulon
uswasane siti uga milangoni driya
nadyan sandhingane watu-watu cilik

kajejer akeh,
wisma nedra gumawe saka atosing kayu
kang dikrubuti wilising terpal
ngarepe ora liya yo akeh krikile

unyane kukila dadi pambukane dina
nora amung iku
nanging unyane kencrung iku, ca
kang dadi pambukane dina

kaseksen birune diyata
dai pambukane memitra
nadyan ratane nora rata

ca,
wayah angga priyangga
ingwang moneng sliramu
sliramu kang adoh saka soca
nanging mapan ing ceraking driya

gojegmu,
esemmu,
tutur,
lan pituturmu
isih tarwaca ing jumantanaku

ca,                                     
amung nunut wursita
ingwang moneng mapan ing sandhingmu,
ungina sliramu,
lan ayem ing wismamu

ca,
bisa mrebes nalika menget
netra ing warih sajroning riris
ngrerepi ing wayah rina
lan mlaku bareng ing mayaning jagat

ca,
udrasaku mring sliramu
amung bisa mangajab
mugaha bisa temu sliramu
kang gawe wernaning dina

Boyolali, 5 Mei 2014

apa

tan bisa nembung

rasane wuwung  apa malah keduwung

tan kandha nadyan disulaya

amung meneng tan prasaja

ngampet kumembeng luh ing nala

sejatine amung nunut sedhela

dikancani riris kang mbedaya

nanging apa?

amung lumantar kandha

nora dadi nyata

ya amung wursita

nora dadi apa

amung gawe lega

boyolali, 24 agustus 2014 

Pring Ori

krengkat-krengket swarane

ngalor-ngidul jogete

diampiri kendhangane narmada

agawe ati tentrem tan culika

nyangga urip semut

anggawe nala dadi kepincut

dijak lelungan ya manut

nadyan pungkasane dadi gelut

Banaran, 12 September 2014 

Lungaha

lungaha

yen dunungmu dadya suwung

lungaha

yen tekamu gawe kemrungsung

lungaha

yen pancen gawe nala temlawung

lungaha

lungaha

ra butuh kekudangmu

ra butuh tembungmu

memanis wanda lir gangsing

muter-muter gegawe lingsir

rina wengi kang gawe gingsir

lungaha!

lungaha!

Gunung Pati, 27 September 2014

kayu kothak

kasangga kaca kothak-kothak

dikukup gendheng kang cumethak

gumandhul padma tirta nra dipathak

jroning laku kairing unyaning sindu

ndhuwur kayu cumepak panganan ratu

apa wae bisa diluru merga cacahe sewu

kari njupuk manut ati kang digugu

lungguh anteng agawe ayem

ngadhep panganan nganti lerem

pancen nora bisa mingkem

mesti wae papane juragan

mambu arum mawar megar

katon endah sinawang

prakara kertas payu tan dadi alangan

Sekaran, 9 Oktober 2014

enthung

dening: Uri Pradanasari

mencla mencle kadya enthung

lunga adoh malah dipenthung

timik-timik pengin disurung

jebulane agawe bingung

nggedumel  terus dipeksa

wira-wiri  disirik janma

amung mesem kecut gawe lara

muna-muna tanpa makna

ngedol abab gawe gela

lungguh anteng nadyan kepepet

gawe mesem semune sepet

ketoe sepele dadi ribet

Sekaran, 10 September  2014

biyung

dening: Uri Pradanasari

biyung, biyung

lakumu rikat

ginawa arit, caping lan kranjang

njangkah ing bumi pertiwi

saperlu nata winih brokoli

biyung, biyung

bubar negal gage nyang gubug

gegenen pawon nggodhog wedang

kluthak-kluthik goreng krupuk

tan kesel lan nggedumel

biyung, biyung

durung rampung terus nyekel ingsun

digendhong jarik dikemuli sarung

agawe nala nora temlawung

biyung, biyung

ingsun tan bisa kocap

nalika kelingan sliramu

amung luh bening kang dadi tembung

Tengger, 15 April 2014

padma nala

sumigrak tan sulaya
ngalor ngidul tetep mbedhaya
pancen iki dalane sing Kuwasa

kala daya nora kuwawa
ludira mili kadya kanca
apa iki kang dadi pratandha?

kumembenging tirta dadi wursita
rasa kang prasaja
tinilas ing badan priyangga

padma nala kang prasaja
dadya kanca kang tetep nandang tresna
tekan pungkasaning garis sing Kuwasa

padma nala kang cinandra
dadya kanca nglakoni dina
kang dadi gegebenganing driya


semarang, 26 oktober 2014

lilin enem juli

tirta lumampah nggawa kapal kojah

wilis nora ana kang kepradhah

padha ngugemi kanthi endah

kotak coklat dadi papan

rikala tresna iki mapan

linambar klasa blarak

disandhing eseme lilin

dikancani wedang ireng sega putih

gojek kuwi isih ana

kacandhet cetha ing prana

esem kuwi ya pancen ana

rikala tresna ngudhungi kanca

kanca kanggo makarya

lir lintang tinekep dirgantara

nora dinuga,

esem kuwi pancen nyata

rasa kuwi tandha tresna

memitran boma kang setya

karangkul sulistyane pratipa

dulur,

dadya dlanggung kang luhur

ngubengi boma kanthi rinangkul

nora bisa nganti ucul

dulur,

padma arga kang misuwur

dadya tandha raketing ulur

nadyan bakal dipisah umur

dulur,

lilin enem juli dadya seksi

ing sandhingmu gawe tentreming ati

                                      Embung,  6 Juli 2014

kartika

kartika mlayu ngoyak eseme boma

ulon moneng mring bomantara

raditya milih anteng tanpa swara

among  tangise gundhala

umuk sedhela banjur lunga

rinengga amuk  sang surya

ima lunga nyandhang kuciwa

Sekaran, 26 Agustus 2014

jadah, jadah

sumingkir kadya ilir

mlayu mrana nalika nglilir

nora reti apa bakal lair

kaseksen hawa kang sumilir

midak lemah tan polah

jenjem anggone mlaku

we tumetes gawe klayu

nadyan diguyu

jeritane sajak maido

apa sajake pancen bodho

apa malah wis nduwe loro

sajake guyone pas mangan soto

cekelane  jadah papat

muna-muni tanpa mripat

kelap-kelip gawe mak tratap

apa nala iki pancen ketatap

nadyan alon

nanging tatune jero

nora nyuara

amung bengak-bengok

mendhem lara, nala layon

Boyolali, 5 Agustus 2014 

guritku

guritku amung celathu

nilasake tatu ing jero kalbu

nadyan nora disandhing tengsu

nanging isih bisa gumuyu

guritku amung kojah

ngadheg mbegegeg tan polah

rasane nora bungah

luh tumetes katon susah

guritku amung wursita

ngajab bisa tumata

kadya riris kang mbedhaya

tan gelem disuda

guritku amung ngronce tembung

kekancan unyaning demung

pratanda nala kang suwung

jane ya nora wangun

guritku amung nggurnita wanda

tan kena diwada

apa maneh disuda

lir ima nenggak waspa

Boyolali, 25 Juli 2014 

wengi abang

wengine wengi abang

cahyane anggegana semu mbranang

nadyan sinandhing sulaking lintang

badra iki milih lelungan

wengine wengi abang

pring-pring garing klothakan

kasenggol playune braja

agawe njekuting hawa

langking kumbu gludhug sesongaran

kaslamur ayang-ayang abang

katon endah sinawang

nanging marakake trataban

pancen katon endah,

nanging ngemu wewadi

nitrane kapaes endah

nanging amung angrumpaka braja

kang ayem diwaca

nanging ora dadi bab sanyata

pancen katon endah,

nanging ngemut wewadi

gaweane nyathutti abab

kanthi memanis reroncen wanda

sakehe laku sadharma

tutup kuping tutup mata

mlaku menciring tanpa dosa 

tepak

katilas tepak ing bumi kae

nalika urip dadi siji mring jagate

nalika urip ngejeni siji lan sijine

nadyan ana telu cacahe

nanging padha gelem cawe-cawe

nora ana sing rebutan

nalika ngantri banyu ing pojok desa

saben pethuk, lakone padha prasaja

pura, sanggar, lan langgar jinejer tanpa bates

disangga aruming siti lan celathune suket

dikancani birune dirgantara lan jogete pratipa

sajroning gremis, tinembus cahya

nora ana sing dadi prahara

tembung lan kekudange warga desa

kang dadi tembange dina

tentrem lan ayem

tanpa winates

manengku puja mring Gusti

njejaga luhuring dharma basundari

tepak sing tinilas, dadi seksi

lelakon sajroning bumi

tepak sing tinilas, dadi seksi                     

tentreming bumine Gusti

tepak sing tinilas, dadi seksi

rikala nunut urip ing ijoning basundari

ngadas,  14 april 2014